انت ياأمى أعز الناس لشاعر / عصام الباز

إنت يا أمي أعز الناس
بعد وفاتك مات الاحساس
بين أحشائك عشت أنا تسعة
رغم صغرها جنة وواسعة
رضعتيني أنا سنتين 
ما سألتيش أجرك فين
ليل ونهار تكبري فيا
استسهلتي تعبك ليا
عمر ما مرة مني قرفتي
بين ذراعاتك عليا ورفتي
ياما تعبتي عشان أرتاح
كنت تقومي في عز صباح
ألقى الشنطة فيها أشيائي
فيها كراريسي فيها غذائي
حطالي وردة بين أوراقي
كبرت وروحت يا ماما الجيش
علشاني يمة لبستي الخيش
اختارتيلي أحلى عروسة
فوق من خدي طبعتي البوسة
ليلة الدخلة كنت حمامة
جهزتيلي أحلى منامة
رحمة ربي عليك يا أمي
باقية روايحك فوق من كمي
اتمنيتك دهر تعيشي
علشان أكبر وأفرد ريشي
لكن الموت خطفك مني
ولسة دموعي بتغسل نني
رحمة ربي عليك يا أمي
ريحة حضنك لسة في كمي

إبنك : عصام الباز